Tuesday, August 11, 2020
Home > गजल > ‘नम्रता संस्कार’ का दुई गजलहरु

‘नम्रता संस्कार’ का दुई गजलहरु

  •  
  •  
  •  
  •  
  •  
  •  
  •  

नम्रता संस्कार, दार्जिलिङ्ग

गजल १.

प्रेमी बिसाउने चौतारीहरू, सुनसान भएको बेला छ
प्रेमप्रित लाउने फूलबारीहरू, विरान भएको बेला छ

विपना त परदेश नै भयो सपनी छन् मात्र मृगतृष्णा
आँखा बिझाउने पर्खाइहरू, थकान भएको बेला छ

न त संगीतको सुरले छुन्छ न तालमा छ कुनै तरङ्ग
प्रेमगीत गाउँने सरगमहरू, बेजान भएको बेला छ

शिरफूल शिरमा प्रेम उपहार कल्पनाको भो कथा
प्रेमपाती चढाउने देउराली, श्मसान भएको बेला छ

याद मात्र हुन्छ ओहोर दोहोर ढुकढुकीको साँघुमा
मुटुका दुईजोर टुक्राहरू, तानातान भएको बेला छ

गजल २

शिर उठाउने आफू एक्लै, ढुङ्गा हान्नेको शहरमा छु
पाइला टेक्ने खुड्किलो छैन, खुट्टा तान्नेको शहरमा छु

पर्खिराछन् चौकीहरू त बस्न आखिर डराउँछ मन
पोशाक र ढाँचा हेरी हेरी, मान्छे छान्नेको शहरमा छु

औंलीको गन्तीमा कहाँ पर्छ मायाको सानो झोपड़ी
ईर्ष्याले जड़ेको महलमा, जीवन धान्नेको शहरमा छु

व्यर्थ छ सुनाउनु कथा व्यथा दुःखी निर्धो जीवनको
टुप्पोमा पलाएको अहंकार, धेरै जान्नेको शहरमा छु

नसोधे नि हुन्छ परिचय बास र टुंगो ‘संस्कार’को
म त हजुर मान्छेलाई, मान्छे नमान्नेको शहरमा छु

Leave a Reply

Your email address will not be published. Required fields are marked *

%d bloggers like this: